Diu tacui. Mense Ianuario Romani olim Ianum deum ancipitem colebant, qui et annum praeteritum et annum ineuntem aspiciebat. More Iani facturus sum.

Adhuc pecunia nostra Europaea communis in summo discrimine est, in summo discrimine rerum Europaea Unio quoque. Ceteris membris Europaeae Unionis debita Graeciae solvenda sunt, imprimis autem Germaniae. Sine ullo dubio Graeci pecuniam nobis debitam numquam reddent. Fortasse aliquando reddent Francogalliae vel Belgio vel Terris Inferioribus, Germaniae autem negabunt et recusabunt. Qua re sic fiet? Lingua Graeca nostri temporis uti possum; itaque non ignoro Graecis persuasum esse Germanos sibi ingentem copiam divitiarum debere. Omnes Graeci mihi noti affirmare non desierunt Germanos tot saecula Graeciam devastavisse et spoliavisse. Dicunt primum equites cruciferos Germanos Medio Aevo Graeciam devastavisse, Constantinopolim expugnavisse et despoliavisse, deinde XIX saeculo archaeologos, e.g. Schliemann thesauros Graecos abstulisse, postremo XX saeculo milites Hitlerenses tot Graecos occidisse. Itaque Graeci credunt se pecuniam sibi a Germanis offertam iure retinere posse et sine ullo dubio non restituent. Nuper Helmut Schmidt, cancellarius noster priscus, nunc vir gravis et senissimus, orationem magni momenti in conventu partium suarum habuit. Monuit nos Germanos, ne magistri Europae simus. Quid ergo? Qua re nos vetat magistros esse? Semper donatores generosi simus, sed taceamus? Nonne cancellaria Merkel iure Graecos monet, ne pecuniam eis a nobis praebitam dissipent? Semper "Zahlmeister", numquam "Lehrmeister" simus? Num Helmut Schmidt oblitus est se ipsum olim magistrum praebuisse Francogallos et Americanos et Britannos rixantes verbis asperis docentes? Equidem bene memini. Iure illo tempore eos docuit, quamquam eum "le feldwebel" et "Schmidt the lip" clamaverunt.
Nuper valde miratus sum publicatione a societate Bertelsmann edita. Dum vixi, legi, audivi, comperi, postremo ipse credidi Germanos septentrionales prudentiores, sapientiores; educatiores, callidiores, omnino superiores esse quam Bavaros et Suevos. Sic nobis septimanalia SPIEGEL et "stern" tot decennia persuaserunt. Nuper autem societas Bertelsmann investigationibus profundis et longis factis probavit rem contrariam: condiciones educationis in provinciis meridionalibus meliores esse et praeter opinionem Suevos et Bavaros eruditiores, humaniores, sapientiores, superiores esse quam Saxones Inferiores et ceteros septentrionales. Attonitus fui et adhuc his factis repertis assuescere debeo.

Dubito enim, quid putem, quae tot annos cottidie observavi: Principes officinanarum et exercitus et universitatum in Bavaria quoque semper viri septentrionales sunt. Memini Monachii plerosque professores meos septentrionales fuisse. Cum annis MCMLXVI et MCMLXUI in Alpibus militabam, nemo centurionum vel tribunorum meorum Bavarus erat.

Adhuc nescio, quid dicam de educatione. Apparet autem Germanos septentrionales natura oratores callidiores et sollertiores esse et scire, quomodo virtutes suas in maius efferant. Bavari fortasse modestiores et oboedientiores et operae durae deditiores sunt?

Quidquid dicat Helmut Schmidt de Germanis, de Europa, - omnes ei applauserunt. Senex est. Et Germanus septentrionalis.

Quid putem de praeside nostro Wulff? Auctoritas eius nunc deleta videtur. Attamen munere suo fungi perget. Verbis electissimis et argumentis elegantissimis heri in televisione se defendit.
Facinora sua in minus detulit. Se agnum paene innocentem praebuit. Germanus septentrionalis est. Cives omnia obliviscentur.
Bonomontamus munere suo abstinere coactus est. Et iure coactus est. Meridionalis est.
Ego neque Bavarus neque Septentrionalis sum. Neuter sum. Non iudico, sed observo et dubito. Tu quoque neuter es, Seneca. Quid tu dicis?
Vale!

Datum Nova Civitate A.D. MMXII ineunte