Nunc "Ecclesiam ad nostram caram dominam", Theodisce "Frauenkirche", videmus.

Saeculo quinto decimo exeunte erecta est, ut cives pii alteram aedem parochialem praeter ecclesiam Sancti Petri haberent.

Huic sedi archiepiscopali Iosephus Ratzinger praefuit, qui postea Romae papa Benedictus sextus decimus (XVI) electus est.

Omnes parietes, turres, columnae totaliter ex permultis lateribus coniungebantur.

Turris altera solum una seria laterum minor est. Quis in ratione laterum erraret, nescimus. Nulla alia causa nobis nota est.

Capita turrium nomine  "Welsche Hauben" templo muslimo nomine "Felsendom" simillima sunt, quia homines olim putabant illud "Felsendom" templum Salomonis fuisse. 

Propter rotundam formam tholorum haec turres longe lateque clarissima insignia urbis Monaci sunt, quod multae chartae postales nobis demonstrant.

Fabula est aedificatorem inter aedificando ecclesiae "Frauenkirche"  cum Satana pignore certavisse.

Satanas enim aedem christianam sine fenestris exstrui non posse affirmaverat.

Aedificio tandem confecto architectus astutus Satanam ad locum diligenter destinatum duxit prope valvas, a quo fenestrae laterales utrimque vere non spectantur.

Insuper fenestra chori pictura ingenti occultata erat, ut Satanas cladem acciperet.

Clade accepta Satanas ita irascebatur terramque  pede tam vehementer percussit, ut ictum pedis usque ad hunc diem aspicere possimus.

Et quem haec res delectet: mensura calceamenti Satanis est quadraginta quattuor.

Hac fabula narrata hodie me vobiscum satis Latine collocutam esse puto inter parvam ambulationem, quae nunc ad finem perducta est.

Vos paulum a me delectatos esse spero.

Maximas gratias vobis ago, quod mihi linguam Latinam loquenti tam longe et libenter aures oculosque praebuistis.

Servus et bene valete!